1. 判斷身體狀況
有健康嘅身體先好潛水係好基本嘅事，不過總有啲人會覺得難得比咗錢又book埋時間，因身體問題而取消好可惜而隱瞞身體狀況。但其實有疾病、肌肉酸痛或疲勞同飲咗酒嘅人都唔適合潛水，千祈唔好隱瞞任何身體狀況！潛水前都應該要有足夠睡眠、休息、有足夠運動量，如果唔係落到水會好容易攰，而且相對容易抽筋。女仔可能會諗如果當時係生理期嘅話仲可唔可以潛水？其實係可以嘅，不過最好儘量避免。每個人身體狀況唔同，有啲人可能係生理期期間會覺得特別痛，呢個時候就唔好潛水啦！
2. 落水前裝備檢查
首先係穿著裝備前要檢查一次有冇咩損壞或老舊，而且揀合身嘅潛水衣、BCD、面鏡等等。然後穿著好裝備後，謹記要做同伴檢查，要跟從BWRAF(B BCD; W Weight Belt; R Release; A Air; F Final Check)，作落水前最後檢查。大家唔好怕麻煩而唔做足檢查，如果係某啲細節位冇檢查清楚都好容兒造成危險。記住落水前，做好面鏡防起霧措施如牙膏、防霧噴劑等，同埋唔好用鼻呼吸，否則大大影響潛水體驗。
3. 清楚整個潛水流程
好多時新手會覺自己唔熟水域而將所有流程交比教練決定，到落水都淨係跟住教練，其他咩都唔清楚。一嚟教練唔知你潛水水平或經驗而判斷錯一條唔適合嘅路線，二嚟如果真係發生意外而走失或者迷路嘅時候，你知道整個潛水規劃嘅話都仲可以有機會搵得返自己位置從而搵到其他潛水員。而且清楚整個潛水流程嘅話，都可以方便大家為下次潛水體驗作準備，如避免重複體驗同一路線等。所以新手都要知道清楚整個潛水流程，唔好輕視呢個步驟！
最後，新手為咗有更好潛水體驗記住要跟隨教練指示，教練嘅判斷一定係為大家提供安全舒適嘅環境比大家體驗，只要唔驚水，相信教練嘅帶領，大家一定會搵到潛水嘅樂趣！潛水嘅時候唔好亂掂海洋生物，一齊好好保護香港僅有嘅海洋生態！
