潛水而家已經越嚟越普遍，不過就有好多新手會因為怕危險或者怕潛水裝備太貴而卻步。睇到最後嘅你就會清楚新手會做錯啲咩加上做足潛水前準備，咁就一定唔洗怕潛水對於新手嚟講太難！只要你係10歲或以上，同埋唔怕水就已經可以成為潛水員！
1. 輕視耳壓平衡
啱啱開始學潛水嘅時候，教練一定會經常提你要做好耳壓平衡，不過有唔少新手係潛水嘅過程中會唔記得做耳壓平衡或者覺得唔痛所以冇做耳壓平衡。但其實係你覺得痛嘅時候先做已經太遲！記住每下潛大概一至兩米就做一此耳壓平衡，千祈唔好怕麻煩！當你真係覺得痛嘅時候可以先上升少少再做耳壓平衡，都係唔得就再上升少少。不過切記唔好過於用力做耳壓平衡，否則會對耳內鼓膜做成傷害，嚴重嘅話甚至會引起耳膜發炎！
2. 未能控制中性浮力
即使係具經驗嘅潛水員都都一定經歷過未能控制中性浮力嘅問題。例如教練叫大家停一停檢查儀錶嘅時候仍不自覺地飄，不自覺咁向咗上游，又或者游得太貼海床。如果潛唔到向下嘅話可以先試試慢慢呼氣，或者垂直身體並慢慢放走浮力調整裝置(BCD, Buoyancy Compensation Device)內嘅空氣。相反，浮唔起嘅話就慢慢吸氣或者慢慢將BCD充氣。過快為BCD放氣或充氣會令下潛與上升時失去控制，而會容易做成危險！當然落水前都要好好調整配重，唔可以因為上次潛水用某重量嘅BCD，而今次都用同一重量。
3. 未有定時檢查儀錶
潛水新手會有個誤解——落水前檢查清楚儀錶就足夠。絕對唔係！落到水之後都要定時檢查所有儀錶，例如新手氧氣用量大部份會比潛水老手用得更快，就好似新手遇到水流或者其他突發事件嘅時候，驚慌嘅情緒會令人大量換氣，進而加快氧氣用量，可能下一次你查望儀錶嘅時候已經用咗好多氧氣，會好容易釀成意外。當然學識自己睇所有儀錶非常重要，一時唔記得點睇儀錶嘅話可能會令你係同教練溝通時報錯數而令教練錯誤判斷釀成危險。新手們記住每5至十分鐘要檢查儀錶同時提醒同伴要檢查儀錶！
4. 忽略四周環境
繼上一個潛水新手犯嘅錯，仲有一種人就係過於頻密檢查裝備、儀錶而忽略四周環境。雖然香港新手可潛水嘅水域都算安全，但係例如因忽略四周環境，過於貼近海床而被沙石擦損或者撞向其他隆起物或其他潛水員，同樣非常危險。新手亦都有機會被海洋生物所吸引而忽略四周環境，如果水底能見度較低嘅話甚至可能會與其他潛水員失散！記住要定期檢查儀錶之外，都要留意四周環境！
