疫情期間，疫情期間，好多人假日都會選擇留係屋企，而且經歷幾個月嘅停課，好多人都厭倦咗日日係屋企。有啲人可能會選擇係呢個時候增值自己，而有啲人會想日日宅係屋企打機，近期大熱Video Game， Switch動物之森，同PS4近期都出咗唔少新作。但係唔鍾意打機嘅人又可以玩咩？就係近年重新興起嘅Boardgame!
今次就為大家介紹三款近期十分熱門嘅Boardgame！
1. 矮人礦坑 (Saboteur)
矮人礦坑係一款3個人或以上就可以玩嘅遊戲。顧名思義係搵出最多金礦嘅人獲勝，不過當中會有壞矮人全力阻止好矮人掘出金礦！
3-4人遊玩有1名壞矮人；5-6人遊玩有2名壞矮人；7-9人遊玩有3名壞矮人；10人以上則有4名壞矮人。身份只有自己知，壞矮人要好好隱藏自己身份！
好矮人要靠道路牌同行動牌儘快搵出金塊，同時要估邊個係壞矮人然後用行動牌封鎖佢嘅行動。而壞矮人就要盡力隱藏自己身份阻止好矮人搵到金塊，壞矮人令好矮人嘅牌出到冇得再出而又未搵到金塊就可以贏到！
2. 牛頭王(6 Nimmt)
牛頭王呢款卡牌遊戲只要兩個人就可以開始玩，玩家要好好選擇擺位或者用邊張卡。成副牌由數字1 – 104組成，每個數字只有一張牌。
首先會抽出4張牌放係檯面，而每位玩家會有10張牌，每回合出一張牌，打出嘅牌只要比檯上嘅4張牌嘅數字大就可以放係該張牌嘅隔離，邊位玩家打出嘅牌排到第6張嘅話，就要食前5張牌，10回合後，每位玩家所食咗嘅牌上所顯示嘅牛頭數量總和就係你有嘅牛頭數，最多牛頭嘅人就輸。
呢個遊戲雖然只係由數字組成，但係背後要考慮好多嘢，例如應該keep邊張係手，出咩數字可以迫到其他玩家嘅牌排第6，如果出嘅牌一定會食5張牛頭嘅話食邊行會少啲牛頭等等⋯⋯絕對唔係咁簡單！
3. 籤籤入扣
呢款boardgame唔係卡牌遊戲，而係款考大家平衡感嘅桌上遊戲。準備功夫好簡單，將底部連有彈弓嘅支柱插進底盤，再係支柱頂部插上有唔同顏色嘅盤就完成。然後每位玩家抽出顏色籤，再放係盤上對應嘅顏色部份。
因為底部係彈弓所以每次放顏色籤上盤時都會好似遙遙欲墜咁！而且唔同顏色籤上會有3種顏色，頭尾會有一少格白色，而其他部份由2種顏色組成。玩家要輪住抽出顏色籤並放上盤上，直到有玩家放唔到或者整個顏色盤倒塌為止！
如果想提升難度嘅話仲可以限玩家擺籤嘅方法，例如只可以用左手(左拗嘅人就用右手)，或者要用筷子擺等嘅自創玩法！
除咗以上3款桌遊之外，其實仲有好多其他好玩嘅桌遊。而係疫情期間可能會少啲機會可以一齊玩桌遊，不過唔洗擔心，因為有唔少網站或者手機app都提供線上桌遊，可以比大家可以同朋友線上玩亦可以同陌生人玩。大家係疫情期間可以玩吓桌遊解悶，唔好日日都只係對住手機、電腦！
